Urte eta erdiko elkarlanaren ondoren, CULTSOS proiektuaren gauzatze-fasea zenbait emaitzarekin amaitu da, eta kulturak garapen iraunkorraren motor gisa duen zeregina indartzen dute emaitza horiek.

Kultura gizarte-ekonomiatik birpentsatzeko aliantza.

CULTSOS: Kultur Sektorearentzako Aliantza Estrategikoa proiektua gauzatze-fasearen amaierara iritsi da, ikuspegi itxaropentsu batekin: kultura luxu bat edo osagarri bat ez dela erakustea, jasangarritasun-estrategia ororen egiturazko pieza bat baizik.

KULTIBA buru duen gizarte-ekonomiako erakundeen partzuergo batek bultzatuta, REDS-SDSN SPAIN, ESPAZOCOOP, ISEA, GOIENA, MLAKOOP eta GARAPENekin batera, CULTSOSek Gizarte Ekonomia Bultzatzeko Plan Integralaren babesa izan du, Europako Batasunak finantzatutako Berreskurapen, Eraldaketa eta Erresilientzia Planaren esparruan (Next Generation EU).

Proiektua, funtsean, kultura eta gizarte-ekonomia elkartzeko gunea izan da. Kulturatik kudeatzeko, lankidetzan aritzeko eta eraldatzeko modu berriak irudikatzeko eta praktikan jartzeko aukera eman duten ideien, metodologien eta tresnen laborategia.

Eraldatzen ari den sektore baterako tresnak, ikasketak eta ikaskuntzak.

CULTSOSek kultura- eta sormen-sektorearen berrikuntza-gaitasuna indartzeko metodologiak, azterlanak eta baliabideak garatu ditu.

Hona hemen emaitza aipagarrienak:
−Kultura eta garapen iraunkorra azterlan prospektiboa, 2030. urterako kulturaren eta GJHen arteko lerrokatze-egoerak zehazten dituena.
−Pandemiaren osteko kultura-kudeaketan teknologia berriak aplikatzeko joeren eta jardunbide egokien azterketa dokumentua, erakunde publiko eta pribatuentzako gomendio zehatzak eskaintzen dituena.
−Kultura Espainian pandemia osteko aroan (2021-2024) txostena, sektoreak azken urteetan izan dituen egiturazko aldaketak aztertzen dituena.

Gainera, CULTSOSek lurralde-jarduerak bultzatu ditu Zornotzan, Bilbon eta Madrilen, 250 pertsona baino gehiagoren parte-hartzearekin, kultura-kudeaketako profesionalen, erakunde kooperatiben, administrazio publikoen eta herritarren artean.

Gune horietan berrikuntzari, iraunkortasunari, lankidetzari eta kultura-politiken etorkizunari buruz eztabaidatu zen.

Kultura kooperatiboagoa, bidezkoagoa eta iraunkorragoa.

Txostenetatik eta tresnetatik haratago, CULTSOSek arrasto sakona utzi du: kultura-erakundeen eta gizarte-ekonomiako erakundeen arteko lankidetza-sarea, hazten jarraitzen duena. Proiektuak loturak indartzen, ikaskuntzak partekatzen eta orain gutxi arte paraleloan zebiltzan sektoreen arteko sinergiak sortzen lagundu du.

Fase honek utzitako legatu ukigarrien artean, hauek nabarmentzen dira:
−Gizarte-ekonomiaren printzipioetan oinarritutako autodiagnostikorako eta lankidetzarako tresnak.
−Jardunbide egokien eta kasu inspiratzaileen gordailu irekia.
−Ikuspegi komun bat partekatzen duten eragileen komunitate bat: kultura tokiko garapen iraunkorraren palanka gisa.

Aurrera begira.

Exekuzio fase hau amaitu bada ere, CULTSOSen lana ez da gelditzen. Partzuergoa dagoeneko diseinatzen ari da ikaskuntzen eta emaitzen jarraipena bermatzeko estrategiak, nazioarteko zabalkundera, prestakuntza aplikatura eta kultura-erakundeei eta tokiko administrazioei laguntza teknikoa ematera bideratutako ekintzen bidez.

Inspiratzen jarraitzen duen proiektu bat.

CULTSOSek etapa hau amaitu du (ibilbide luze baten hasiera baino ez delakoan), bide bat ireki izanaren ziurtasunarekin: bere burua eraldaketa sozialeko eragile gisa pentsatzen duen kultura. Proiektuaren ondarea (metodologiak, azterlanak eta tresnak) lankidetzaren, sormenaren eta guztion onerako konpromisoaren bidez eraikitzen jarraitu nahi dutenen esku geratzen da orain.

Informazio gehiagorako, elkarrizketak eskatzeko edo ikus-entzunezko materiala eskatzeko, CULTSOS proiektuarekin lotutako edozein erakunderekin jar zaitezkete harremanetan, haien webguneen edo harremanetarako bitartekoen bidez.

Proiektuaren informazio guztia, dokumentuak eta baliabideak eskuragarri daude hemen: www.cultsos.es.

Gizarte Ekonomia Bultzatzeko Plan Integralak finantzatutako proiektua da CULTSOS, Berreskuratze, Eraldaketa eta Erresilientzia Planaren esparruan (Next Generation EU).